રાજપીપલામાં રાજ્યકક્ષાની SGFI જીમ્નાસ્ટિક સ્પર્ધાઓનો શુભારંભ કરાવતાં નાંદોદના ધારાસભ્ય ડો. દર્શનાબેન દેશમુખ
સ્પોર્ટ્સ ઓથોરિટી ઓફ ગુજરાત, ગાંધીનગરના સંચાલન હેઠળ તથા નર્મદા જિલ્લા રમતગમત અધિકારી કચેરી દ્વારા ભાઈઓ તથા બહેનોની SGFI રાજ્યકક્ષાની શાળાકીય અંડર ૧૪, ૧૭ અને ૧૯ જીમ્નાસ્ટિક સ્પર્ધાઓનો પ્રારંભ નાંદોદના ધારાસભ્ય ડો. દર્શનાબેન દેશમુખના હસ્તે કરવામાં આવ્યો હતો.
વિદેશમંત્રીશ્રી ડો. એસ. જયશંકરના અનુદાનમાંથી રૂ. ૨.૪૦ કરોડના ખર્ચે ખેલકૂદ માટે તૈયાર કરાયેલા અદ્યતન જીમ્નાસ્ટિક હોલને કેન્દ્રમાં રાખીને નાંદોદના ધારાસભ્ય ડો. દર્શનાબેન દેશમુખે જણાવ્યું કે, અહીં રમતવીરોની ફિટનેસ તથા તેમના પ્રદર્શનને વધુ બહેતર બનાવવા માટે કોચો દ્વારા વિશેષ ધ્યાન આપવામાં આવે છે. તેમણે વધુમાં જણાવ્યું કે આપણો ધ્યેય હંમેશાં ઉંચો હોવો જોઈએ અને તેને હાંસલ કરવા માટે સતત મહેનત જરૂરી છે. ખેલાડીઓ પોતાના લક્ષ્યને નિર્ધારિત કરીને ઉત્કૃષ્ટ પ્રદર્શન કરે, મેડલ હાંસલ કરે અને જિલ્લા, રાજ્ય તથા રાષ્ટ્રનું નામ રોશન કરે તેવી આશા પણ તેમણે વ્યક્ત કરી હતી.
નોંધનીય છે કે, શ્રી અંબુભાઈ પુરાણી સ્કૂલ ખાતે અંડર ૧૪, ૧૭ અને ૧૯ રિધમિક જીમ્નાસ્ટિક, અંડર ૧૯ એક્રોબેટિક્સ જીમ્નાસ્ટિક તેમજ અંડર ૧૪, ૧૭ અને ૧૯ આર્ટિસ્ટિક જીમ્નાસ્ટિક સ્પર્ધાઓનો પ્રારંભ કરવાતાં પૂર્વે રમતવીરોએ મહાનુભાવો સમક્ષ પોતાના ખેલ કૌશલ્યનું પ્રદર્શન કર્યુ હતું.
આ તકે સ્પોર્ટ્સ ઓથોરિટી ઓફ ગુજરાતના હેડ કોચ (બહેનો), આંતરરાષ્ટ્રીય જજ તથા આંતરરાષ્ટ્રીય સ્તરના કોચ શ્રી સુમિત ખારપાસ, આંતરરાષ્ટ્રીય સ્તરના કોચ શ્રી હિમાંશુભાઈ દવે, ફેનિલ પટેલ સહિતના કોચોને પુષ્પગુચ્છ આપીને સન્માનિત કરવામાં આવ્યા હતા.
શ્રી છોટુભાઈ પુરાણી વ્યાયામ વિદ્યાલય ખાતે ઉત્સાહભર્યા માહોલમાં સ્પર્ધાઓ શરૂ થઈ છે, ત્યારે સાથોસાથ નાંદોદના ધારાસભ્ય ડો. દર્શનાબેન દેશમુખે ખેલમહાકુંભ અંતર્ગત ચાલી રહેલી બાસ્કેટ બોલ અને સ્કેટિંગના રમતવીરોને પ્રોત્સાહન પુરુ પાડ્યું હતું.
આ પ્રસંગે શ્રી ગુજરાત વ્યાયામ પ્રચારક મંડળના મહામંત્રી ડો. કરણસિંહ ગોહિલ, જિલ્લા રમત વિકાસ અધિકારી દિનેશભાઈ ભીલ, ગુજરાત જીમ્નાસ્ટિક એસોસિયેશનના જોઈન્ટ સેક્રેટરી રણજીતભાઈ વસાવા, જીમ્નાસ્ટિક કોચ ગૌરીશંકર દવે, ગુજરાત વ્યાયામ પ્રચારક મંડળના કેમ્પસ ડાયરેક્ટર ડો. કે.જે. ગોહિલ, શ્રી છોટુભાઈ પુરાણી કોલેજના પ્રાચાર્ય પી.વી. આચાર્ય સહિત સમાજસેવી, જિલ્લાના અગ્રણી, કોચો તેમજ મોટી સંખ્યામાં રમતવીરો ઉપસ્થિત રહ્યા હતા.
