વડોદરામાં ફરી એકવાર ડ્રીંક એન્ડ ડ્રાઇવની બેદરકારી જોવા મળી છે. રાજ્યમાં દારૂબંધી હોવા છતાં દારૂ પીનારા પીવે છે અને વેચનારા વેચે છે, જ્યારે કાયદાનું કોઇ ભાન ન રાખતા નશામાં ધુત વાહનચાલકો માર્ગ અકસ્માતો સર્જતા રહે છે. ભૂતકાળમાં આવા બનાવો નિર્દોષોના જીવ લઇ ચૂક્યા હોવા છતાં પોલીસ દ્વારા કડક કાર્યવાહી ન થવા અંગે લોકો વચ્ચે ભારે નારાજગી જોવા મળે છે
ગઈ કાલે આજવા રોડ વિસ્તારમાં શ્રી હરિ ટાઉનશીપના ગેટ સામેના બમ્પર નજીક નશામાં ધુત એક કાર ચાલકે બુલેટ ચાલકને અડફેટે લેતા અકસ્માત સર્જાયો હતો. ઇજાગ્રસ્ત બુલેટ ચાલકને તાત્કાલિક સારવાર માટે ખસેડાયો હતો. કારમાંથી દારૂ મળ્યાના પણ આક્ષેપો સામે આવ્યા હતા. સ્થળ પર ભેગા થયેલા નાગરિકોએ નશાખોર કાર ચાલકને મેથીપાક ચખાડ્યો હતો શ્રી હરિ ટાઉનશીપના રહેવાસીઓ દ્વારા નશો કરી વાહન ચલાવનાર સામે તીખો આક્રોશ વ્યક્ત કરવામાં આવ્યો હતો તેમજ પોલીસની કામગીરી પર ગંભીર સવાલો ઉઠાવ્યા હતા. સ્થાનિકોએ પાલિકા તંત્રની બેદરકારી અંગે પણ ગુસ્સો વ્યક્ત કર્યો હતો. વિસ્તારમાં બનાવેલા બમ્પરો પર સફેદ રંગ ના પાટા ન હોવાને કારણે બમ્પર વાહનચાલકોને તે દેખાતો નથી, જેના કારણે અકસ્માત સર્જાવાની શક્યતા વધી જાય છે. નાગરિકોએ તંત્રને તાત્કાલિક કાર્યવાહી કરવાની માંગ કરી હતી.નગરજનોમાં વધતા રોષ વચ્ચે ફરી એક વાર દારૂબંધીનો સાચો અમલ અને ડ્રિન્ક એન્ડ ડ્રાઇવ પર કડક કાર્યવાહી પોલીસ તંત્ર કરે તે જરૂરી બન્યું છે
