વડોદરામાં SIR પ્રક્રિયામાં ચાલી રહેલી ગેરરીતિઓ અંગેના આક્ષેપો સાથે SUCI(C) એ કલેકટર કચેરીએ આવેદનપત્ર આપ્યું હતું
વડોદરા શહેરમાં SIR પ્રક્રિયા દરમિયાન નાગરિકો સાથે થઈ રહેલી ગેરકાયદેસર, અસ્પષ્ટ અને અન્યાયિક કાર્યવાહી સામે સોશિયાલિસ્ટ યુનિટી સેન્ટર ઓફ ઈન્ડિયા (કમ્યુનિસ્ટ) — SUCI(C) દ્વારા જિલ્લાધિકારીને આવેદન પત્ર સોંપીને તાત્કાલિક પગલાં લેવાની માંગ કરવામાં આવી છે. પાર્ટીએ આક્ષેપ કર્યો છે કે શહેરના અનેક વિસ્તારોમાં BLOઓ નાગરિકોને SIR–2024ની અરજીઓ ફરજિયાત રીતે ભરાવવા દબાણ કરી રહ્યા છે અને વાસ્તવિક નાગરિકોના નામ મતદાર યાદીમાંથી કાપી નાખવાની, ખોટી નોંધણી કરવાની તેમજ નામ ખસેડી નાખવાની ગંભીર ફરિયાદો સામે આવી રહી છે.
રજુઆતમાં ઉલ્લેખ કરવામાં આવ્યો છે કે BLOઓ દ્વારા 2002ની ચૂંટણીને રેફરન્સ બનાવી નાગરિકોને નામ કાપવાની ધમકી આપવામાં આવી રહી છે. કેટલીક જગ્યાએ તો મતદારયાદીમાંથી 70થી વધુ નાગરિકોના નામ કાઢી નાખવામાં આવ્યા હોવાનું જણાઈ આવ્યું છે. મતદારયાદીમાં નામ હોવા છતાં નાગરિકોને “અમાન્ય” જાહેર કરી SIR ફોર્મ નહીં ભરવાની ચેતવણી આપવામાં આવી રહી છે, જ્યારે 2002ના રમખાણોના બહાને કેટલાક પરિવારોને અનાવશ્યક રીતે ટાર્ગેટ કરવામાં આવી રહ્યા છે. પાર્ટી મુજબ SIR પ્રક્રિયાનો દુરુપયોગ કરીને નાગરિકોમાં ભયનો માહોલ ઊભો કરવામાં આવી રહ્યો છે. આ ઉપરાંત SUCI(C)એ આક્ષેપ કર્યો છે કે કેટલાક વિસ્તારોમાં તંત્ર પોલીસ મશીનરીનો અયોગ્ય ઉપયોગ કરી લોકોના ઘરો સામે દબાણનું વાતાવરણ ઉભું કરી રહ્યું છે, જેના કારણે નાગરિકોમાં અસુરક્ષા અને માનસિક તાણ ફેલાઈ રહ્યું છે. પાર્ટીએ માંગ કરી છે કે BLOઓ દ્વારા નાગરિકો સાથે કરવામાં આવતી ગેરરીતિઓને તાત્કાલિક બંધ કરાવવામાં આવે, SIR પ્રક્રિયાનો દુરુપયોગ રોકી નિષ્પક્ષ તપાસ હાથ ધરવામાં આવે, 2002ના બહાને નામ કાપવાની ધમકી આપતા કર્મચારીઓ સામે કાર્યવાહી થાય અને મતદારયાદી તેમજ સરકારી દસ્તાવેજોમાં નાગરિકોને ન્યાયપૂર્ણ અને પારદર્શક વર્તન મળે તેની ખાતરી કરવામાં આવે.
આ આવેદન SUCI(C) વડોદરા જિલ્લા સંગઠનિક કમિટીના તપન દાસગુપ્તા દ્વારા સહી સાથે જિલ્લા કલેક્ટરની કચેરીમાં સોંપવામાં આવ્યું હતું.
