સુરતમાં લોન અને નોકરીની ઓફર આપવાના બહાને છેતરપિંડી કરનારાઓ સામે સાયબર ક્રાઈમ સેલે મોટી કાર્યવાહી હાથ ધરી છે. ઓનલાઈન લોન આપવામાં આવશે એવો દાવો કરીને અને નોકરી આપવાની ખાતરી આપીને અનેક લોકોને છેતરવામાં આવ્યા હોવાના ખુલાસા થયા છે.15 નવેમ્બરે સુરત સાયબર ક્રાઈમ સેલે ડુમસ ખાતેના સ્વસ્તિક યુનિવર્સલ નામની ઓફિસ પર દરોડો પાડી નિતેશ ખાવાનીની અટકાયત કરી હતી . તેની પૂછપરછ દરમિયાન બહાર આવ્યું કે નિતેશ અને તેની ટીમ મુંબઈ, ગોવા, પુણે અને સુરતમાં નકલી કોલ સેન્ટર ચલાવી લોકોને ઠગતા હતા. ઓફિસમાં તપાસ દરમિયાન મળેલા પુરાવાઓ પરથી જાણવા મળ્યું કે આરોપીઓ ઓનલાઈન લોન આપવાની આડમાં લોકોના દસ્તાવેજો મેળવી બેંકમાંથી પૈસા ઉપાડી લેતા હતા. સાથે જ કોલ સેન્ટરમાં કામ કરતા કર્મચારીઓ પાસે નોકરી શોધનારાઓનો ડેટા મંગાવી તેમને નિશાન બનાવવામાં આવતા હતા.
નોકરી આપવાના બહાને સંપર્ક કરાયેલા લોકોની જાણ વગર ₹10,000 માં ઓનલાઈન ડિજિટલ કરાર પર સહી કરાવવામાં આવતી હતી. ત્યારબાદ આ કરારના આધારે વકીલો મારફતે કાનૂની નોટિસ મોકલી ધાક-ધમકી આપી પૈસા વસૂલવામાં આવતાં હતા.આરોપીઓની ઓફિસોમાંથી બેંકની 1,187 ECH/NACH ડિપોઝિટ એન્ટ્રીઓ મળી આવી છે અને તપાસ દરમિયાન કુલ 1,222 પીડિતોની વિગતો સામે આવી છે. નિતેશની માહિતીના આધારે પોલીસે સુરતની જ બીજી ઓફિસમાંથી મોહમ્મદ જાવેદ નાસિરવાલાની પણ ધરપકડ કરી છે.સાયબર ક્રાઈમ સેલે બંને આરોપીઓને કસ્ટડીમાં લઈ વધુ તપાસ શરૂ કરી છે. આવી છેતરપિંડીથી સાવચેત રહેવા અને અજાણી લોન તથા નોકરીની ઓફરથી દૂર રહેવા માટે પણ વધુ એકવાર ચેતવણી આપવામાં આવી છે.
