સુરતના વરાછા વિસ્તારમાં ગે ડેટિંગ એપ મારફતે સંપર્કમાં આવેલા ત્રણ યુવાનોએ એક રત્નકલાકારને મળવા બોલાવી તેની પાસેથી રોકડ, મોબાઈલ અને બાઈક લૂંટી લીધા હતા. આરોપીઓએ ચપ્પુની અણીએ યુવાનના ખાતામાંથી 5,000 પણ ટ્રાન્સફર કરાવી લીધા હતા. આ ગંભીર ગુના અંગે વરાછા પોલીસે તાત્કાલિક કાર્યવાહી કરીને બે આરોપીઓ અર્શીત સાખંટ અને દીપેન રાઠોડની ધરપકડ કરી છે, જ્યારે અન્ય એક યુવકની શોધખોળ હાથ ધરી છે.મળતી માહિતી પ્રમાણે, સુરતમાં કતારગામમાં રહેતા 29 વર્ષીય રત્નકલાકાર ગે એપ મારફતે અજાણ્યાઓના સંપર્કમાં આવ્યો હતો. ગઈ તારીખ 18 ઑગસ્ટ 2025ની રાત્રે આશરે 8.30થી 9.30 વચ્ચે આરોપીઓએ તેને વરાછા મારૂતિ ચોક પાસે આવેલા ગોપાલ શુઝ પાસે બોલાવ્યો હતો. તે ત્યાં પહોંચ્યો ત્યારે આરોપીઓ તેને ચપ્પુથી ડરાવી એક મકાનના ચોથા માળે લઈ ગયા હતા અને ત્યાં તેની પાસે 50,000 માગ્યા હતા.પૈસા ન આપતા તેનો વીડિયો ઉતારી સોશિયલ મીડિયા પર ફરતો કરી બદનામ કરવાની ધમકી આપી હતી અને તેને માર માર્યો હતો. ગભરાયેલા યુવક પાસેથી આરોપીઓએ તેના જ મોબાઇલનો ઉપયોગ કરી ગુગલ પે મારફતે રૂ. 5,000 ટ્રાન્સફર કર્યા હતા. બાદમાં તેનો રૂ. 8,000નો મોબાઈલ અને રૂ. 80,000ની કિંમતની હોન્ડા કંપનીની બાઈક છીનવી લીધી હતી. ‘પૈસાની વ્યવસ્થા કરીશ તો તારો ફોન અને બાઈક પાછું લઈ જજે, નહીં તો મારી નાંખીશ’ તેવી ધમકી આપી ત્રણેય ત્યાંથી ફરાર થઈ ગયા હતા.
આ મામલે ભોગબનનાર યુવાને વરાછા પોલીસ સ્ટેશનમાં ત્રણ અજાણ્યા યુવકો સામે ગુનો નોંધાવ્યો હતો. પોલીસે ગણતરીના કલાકોમાં બે આરોપી અર્શીત નાજાભાઇ સાખંટ અને દીપેન હીતેશભાઇ રાઠોડની ધરપકડ કરી છે. જ્યારે અન્ય આરોપીની શોધખોળ ચાલી રહી છે. ઝડપાયેલા બંને આરોપીઓ ગુનાહિત ઇતિહાસ ધરાવે છે. દીપેન સામે હત્યાનો ગુનો પણ નોંધાયેલો છે.